قرأت مرة قصة بعنوان : أشتاق لحنانك يا جدتي
كتبها طفل صغير لجدته التي ماتت وشعر بالحزن لفراقها
تأثرت لدرجة شديدة مما دفعني لأن أكتب رسالة لأحب الناس لقلبي لأمي الحبيبة التي فقدتها وأشتاق لها رحمها الله
كنت كلما قرأت هذه الرسالة - التي كتبتها لأمي أشكو لها ما حدث بعد وفاتها وهمومي ومشاكلنا التي ما كانت لتحدث لو أنها بيننا - كنت أبكي بكاءاً مراً و أتحسر لأنني لا أعرف ما إذا كانت أمي ستقرأها في عالمها الذي تسكنه الآن أم أنني أكتب لسراب..
واليوم بدا لي أمراً غريباً..خطر ببالي أن أكتب رسالة لربي بعنوان : أشتاق إليك ياربي
رسالة أشكو له بها كل ما يهمني
فكتبت أقول :
يـــــــــالله .... ياربي .. أنت تعلم حالي يارب - عم إكتبلك هالرسالة بس هالمرة أنا متأكدة أنك عم تقراها وتعرف اللي فيها وهالشي عم بشعرني بالتفائل ورح يخليني كل ما اقراها اشعر بالأمل اللي كتير مرات بفقده
بدي قلك يارب إني شتقتلك كتييير بس زعلانه لأني ما بعرف ليش ماعم ذوب وينعصر قلبي كل ما تذكرت بعدي عنك
ولا عم إبكي حتى إغرق بدموعي كل ما دق قلبي لفراقك متل ما بحس لما اتذكر امي - رغم أنه بعدي عنك طال كتيييييييير
بدي قلك يارب إني تعبت كتير وانهد حيلي من كتير الابتلاءات اللي عم تصير معي - ودايما مستمرة ماعم تخلص
وبدي قلك كمان اني خجلانه كتييير من هالمصايب والذنوب اللي صارت تقيلة وهدتلي حيلي
يارب أنت خلقتني وأنت أعلم بنفسي وأعلم بما فيها وأنت قادر انك سبحانك تمنعني عن كل ذنب
يارب أنا بعرف انك عم تسمحلي اذنب بدون ما تعجل لي بالعذاب لأنك رحيم بس كمان بعرف انك شديد العقاب وهالشي عم يرعبني فيارب ارحمني وامنع عني الذنوب - لاني ابدا مالي حمل عقابك ولا انتقامك
يارب اشتقتلك واشتقت ابكي بين ايديك سبحانك
من زمان كنت لما ازعل -ما كان الي غير امي الحنونه كنت روح لها وتحضني وتبكي معي لانها مابيدها شي تعمله لأجلي - بس هلق بعرف تماما اني لما ابكي بين ايديك فانت الحنون اللي بيدك تعمل لي أي شي بدي ياه
يارب انا زرت بيتك وانت سبحانك قلت عن ضيوف بيوتك انه حق عليك أن تكرمهم وقلت كمان سبحانك:انا عند ظن عبدي بي - وأنا بقول يارب انا ظني بك انك رح تفرج كربي اليوم وتعطيني كل اللي ببالي وكمان مارح تحرمني من رؤيتك
و رح تكرمني برؤية حبيبي وحبيبك سيدنا محمد في الدارين
وكمان ظني بك انك رح تعاملني برحمتك وليس بعملي وبالتالي فلأن رحمتك وسعت كل شيء فأنا متأكده انك يارب رح تكرمني بقصر بالجنة يطل على قصر حبيبي وسيدي وقرة عيني رسول الله ورح كون جارته ومتل ما وصيته على سابع جار - رح توصيه فيني - وكل يوم زوره من الصبح قبل الفطور - زوره سلم عليه وكحل عيني برؤياه وبعدين روح افطر واتهنى ببقية يومي - واجتمع عنده بكل أحبابي وأهلي وأخوتي في الله - وكل الناس اللي بحبهم - وكمان حبيبي رح يعزمني على الفطور عنده ونروح سوا إلى مقعد صدق عند مليك مقتدر - نجيلك يارب - متل ما كنا نجيلك بالدنيا ونتعب ونحنا عم نجاهد انفسنا كرمالك يارب - هلق رح نجيلك بدون تعب ونقر عيوننا ونفرح برؤيتك ونعرف انه كل همومنا بالدنيا كانت ولا شي لانها كانت سبب برؤيتك اليوم لانها رفعتنا لهالمنزلة
ومن هلق لهداك اليوم مافيني غير قول : يااااااااااااااربي بحبك والله بحبك وشتقتلك
بقلم رولا يسمح بنشره شرط ذكر المصدر
يا رحمن يا رحيم
ردحذفيا حى يا قيوم
صل على نبيك الكريم
و إجب دعاءنا يا اكرم من سئل
اللهم إعطى كاتبة هذه الكلمات الطيبة الخير فى الدارين
و إرزقها الخير كل الخير من حيث لا تدرى و لا تحتسب فأنت الملك الكريم
و صل الله على النبى الكريم صل الله عليه و سلم
آمين آمين يارب العالمين
ردحذفشكرا اخي لدعائك الجميل - الله يارب يعطيك مثل ذلك واكثر الله يقر عينك ويجبر خاطرك وينولك مرادك في الدارين ويرزقك رؤية الحبيب وجواره في جنات النعيم امين يارب العالمين
الله يقويكي على فعل الخير ونشر السعادة بين العالم
ردحذفلأنك فعلا عمتعطينا مفاتيح السعادة بهالدنيا وهي محبة الله وضعو بين عيوننا بكل أيامنا وأوقاتنا الله بجاه الحبيب محمد ينولك يلي ببالك ويعطيكي السعادة بملقى الحبيب محمد ورب العالمين ويطعمنا وإياكي وكل مؤمن صادق